Horsens, 27. december 1532 Originaltekst, LatinDe Conuentu Horsnensi.Huius monasterii fratrum profligationis processus.Post multa et innumera conuicia obprobriaque auribus fratrum a maledicis Lutheranis ad longum tempus ante eorum expulsionem de cenobio inflicta et inculcata, tandem cum dictus ille Magnus Gøe, omnium bene viuentium persecutor, pluries ciues Horsnenses Lutheranos instigasset, quatinus fratres nostros de cenobio expellerent suo, ipsi sepenumero tentauerunt eos, vt voluntarie resignarent eis prefatum conuentum. Et propinarunt singulis fratribus honestam propinam ac debitam prouisionem; sed semper in cassum laborauerunt, semperque negatiuum reportauere responsum. Et cum nullo pacto possent fratres blandiciis aut minis expellere propter defensionem Mandropp Holck, qui habebat ius fundationis illius cenobii et multum fratribus fauebat, demum, consilio habito cum impiissimo domino antedicto Magno Gøe, qui suasit predictis ciuibus, vt adirent regiam maiestatem ferentes ei monstrancia et calices ecclesiarum vrbis Horsnensis, vt eis cenobium nostrum venderet, quod et factum fuit: Vnde duo predictorum Horsnensium ciuium, videlicet Burgimagister Lass Jenfß cum alio, ad regiam maiestatem in Gotteropp commorantem perrexerunt, et impetrauerunt litteras super cenobium fratrum, vt sui iuris de cetero permaneret. Que littere regie maiestatis coram fratribus in conuentu in vnum congregatis lecte fuerunt ipso die sancte Barbare virginis et martiris; ex quibus innotuerunt predictis fratribus plura et innumera falsa crimina fuisse narrata coram regia maiestate. Quibus litteris lectis et induciis pro responsione danda receptis, de consilio omnium fratrum diffinitum taliter respondere: "In primis" (inquiunt) "protestamur, nos omnino innoxios querimoniis regie maiestati propositis, vt littere eiusdem regie maiestatis sonant, nec ob has causas aliquatenus velle cenobium nostrum deserere. Sed vrgente principis iussione et compellentibus litteris eiusdem regie maiestatis, fatemur ex obedientia, tanquam aduene et peregrini, magis velle cedere quam in contrarium appellare, de grauaminis releuatione desperati propter amicorum paucitatem negotium fauorabiliter apud prefatam maiestatem regiam valentium promouere." Tandem ipso die Diui Thome martiris de Canturia episcopi, omnibus elemosinis a fratribus ablatis, omnes predicti fratres eiusdem conuentus Horsnensis vna eademque hora a suo monasterio inhumaniter confusibiliterque sine omni iusticia et ratione sunt expulsi, anno et die quo supra.Explicit qualiscunque Modus et Ordo in causa profligationis fratrum Minoritarum prouincie Danice. | Kilde:Scriptores minores historiae. Danicae Medii Aevi, Ex codibus denuo recensuit. II, s. 366-67. Emneord:Gejstlige institutioner og personer - Konvent - Kloster |
